25.04.2020 

Եզրափակիչ խաղ | Հովհաննես Սմոյան

Ֆրանսիացի գրող Ժյուլ Ռոմենը գտնում էր, որ դրա մասին կարելի է խոսել ժամերով, իսկ ամերիկացի գործարար, «Ֆորդ» ընկերության երբեմնի նախագահ Լի Յակոկան ափսոսանք էր հայտնում, որ չկա մի հաստատություն, որը սովորեցնի դրա արվեստին։  

Հարց
Ինչի՞ մասին են այսպես արտահայտվել Ժյուլ Ռոմենն ու Լի Յակոկան:

Պատասխան 
Դրա մասին կարելի է խոսել ժամերով...  Ցավոք, չկա մի հաստատություն, որը սովորեցնի դրա արվեստին։ Խոսքը ԼՌԵԼՈՒ մասին է։
11.01.2020 

Եզրափակիչ | Հերմինե Սարիբեկյան, տնտեսագետ, գ. Մխչյան 

Այս լուսանկարները տեղ են գտել ամերիկացի լուսանկարիչ Օլիվիա Լոկերի ֆոտոնախագծում:

Հարց
Ի՞նչ է նկարագրել Օլիվիան այդ լուսանկարների օգնությամբ:

Պատասխան
Եկեք նայենք այդ լուսանկարներից մի քանիսին: Աղջիկը մերկանում է տղամարդու դիմանկարի առաջ: Երիտասարդը հեծանիվ է քշում լողավազանում: Ամերիկյան դրոշը խրված է օճառի մեջ….

Լուսանկարիչ Օլիվիա Լոկերն իր ֆոտոնախագիծն անվանել է «Ես խախտել եմ օրենքը» և նկարագրել է ամենաարտասովոր օրենքները, որոնք մինչ օրս գործում են ԱՄՆ-ի տարբեր նահանգներում: Օրինակ, Կալիֆորնիայում չի կարելի լողավազանում հեծանիվ քշել: Հավայան կղզիներում չի կարելի ականջների մեջ մետաղադրամ դնել:  Յուտա նահանգում արգելվում է ջութակը տեղափոխել թղթե տոպրակում: Օհայոյում արգելվում է մերկանալ  տղամարդու դիմանկարի առաջ: Կանզասում չի կարելի գինին մատուցել թեյի բաժակով:  Նևադայում ամերիկյան դրոշը չի կարելի խրել օճառի մեջ և այլն:
02.10.2019 

Եզրափակիչ խաղ | Լեւոն Սահակյան, փաստաբան Երեւանից

Այս լուսանկարն արվել է նախորդ դարի 50-ական թվականներին: Տարիներ անց Խորհրդային Հայաստանի պարբերականներից մեկում տպագրված հոդվածում նշվում է, որ երբ այս տղամարդը դիրք է ընդունում ֆոտոխցիկի առջև, լուսանկարիչն առաջարկում է նրան լուսանկարվել նման դիրքով:

 
Հարց
Ո՞վ է լուսանկարում պատկերված տղամարդը: 

Պատասխան
Երբ տղամարդը դիրք է ընդունում ֆոտոխցիկի առջև, լուսանկարիչն առաջարկում է առաջ պարզել այն մատը, որով սեղմել էր ատրճանակի ձգանը՝ Թալեաթ փաշային գնդակահարելիս։ 

Այդ մարդը Սողոմոն Թեհլերյանն է:

 

 

 

  
29.06.2019 

Խաղ 8 | Աննա Օհանյան, քաղաքագետ, Երեւանից 

Կարելի է վստահաբար պնդել, որ 1966 թվականին լույս աշխարհ եկած այդ ստեղծագործության կերտմանը մասնակցել են Կառլ Բենցը, Թոմաս Ալվա Էդիսոնը և նույնիսկ Նոյը: 

Հարց 
Մեկ րոպեից կատարեք գոնե մեկ դրվագ այդ ստեղծագործությունից: 

Պատասխան
Man made the cars to take us over the road
Տղամարդը ստեղծել է ավտոմեքենաներ, որ մենք կարողանանք երթևեկել, 

Man made electric light to take us out of the dark
Տղամարդը հայտնաբերել է էլեկտրականությունը, որպեսզի մենք դուրս գանք խավարից, 

Man made the boat for the water, like Noah made the Ark
Տղամարդը ստեղծել է նավակ, այնպես, ինչպես Նոյն է տապան կառուցել: 

 1966 թվականին Ջեյմս Բրաունը և Բեթթի Ջին Նյուսոմը ստեղծել են «It’s a Man’s Man’s Man’s World» հիթը:

 

22.06.2019 

Խաղ 7| Մարիամ Բոյաջյան, մանկավարժ Երևանից 

Վերջերս գիտնականները հետազոտություն են իրականացրել, որի ընթացքում հեռախոսային խցիկում 25 ցենտանոց մետաղադրամ են թողել: Այն բանից հետո, երբ ինչ-որ մեկն օգտվում էր խցիկից, նրան մոտենում էր հետազոտողներից մեկը, պատմում մոռացած գումարի մասին և ժպիտով հետաքրքրվում էր, թե արդյոք այդ մարդը չի գտել փողը: Հետազոտության մասնակիցների կեսից ավելին ստել է:

Հարց
Ցուցադրեք այն, ինչը հետազոտողներն ավելացրել են հետազոտության մեջ, ինչի արդյունքում ստող մարդկանց թիվը նվազել է 70 տոկոսով: 

Պատասխան
Նախքան խցիկից դուրս եկող մարդու հետ երկխոսության մեջ մտնելը հետազոտողները սկսեցին նրան ողջունել ձեռքսեղմամբ:

Ձեռքսեղմումը թույլ է տալիս հաստատել կապ, որի շնորհիվ մարդն ավելի լոյալ է ընդունում դիմացինի խոսքերը և հեշտությամբ է մտնում շփման մեջ:

 

 

08.06.2019 

Խաղ 5 | Նաիրուհի Դունամանյան, Սպիտակ 

Այդ բառակապակցությունը Հին Արևելքում հայտնի էր որպես մեծաշուք տիտղոս։ «Ես» ասելու փոխարեն թագավորներն իրենց այդպես էին կոչում:

Արդի հայերենում պահպանված արտահայտությունն ու դրա ձևափոխություններն այդ հնագույն տիտղոսի իմաստափոխված մնացորդներն են։ 

Հարց
Ո՞ր արտահայտության մասին է խոսքը:

Պատասխան
Այդ բառակապակցությունը Հին Արևելքում հայտնի էր որպես մեծաշուք տիտղոս։
«Ես» ասելու փոխարեն թագավորներն իրենց կոչում էին՝ իմ Արև։

Մարդիկ էլ թագավորի անունով երդվելու ժամանակ ասում էին՝ իմ արևը վկա։ Հետագայում այդ երդումը իմաստափոխվեց և դարձավ սովորական խոսք, իսկ ոմանց շուրթերում նաև՝ ապացուցելու փորձ, որ իրենք չեն ստում:

 

 
 



 
 
25.05.2019 

Խաղ 3 | Լիպարիտ Բեժանյան, ուսանող Երևանից 

Սովետական Միությունում իրականացված ատոմային ռումբի փորձարկումներից հետո Իոսիֆ Ստալինի համար մշակվեց հատուկ փաստաթուղթ, որն արտահայտում էր ամբողջ ատոմային նախագծի մասշտաբները: 

Հարց
Ինչպե՞ս էին այդ փաստաթղթում առանձնացրել հույժ գաղտնի տեղեկությունները: 

Պատասխան
Հատուկ փաստաթղթում, որը մշակվել է Ստալինի համար՝ ատոմային ռումբի փորձարկումներից հետո, հույժ գաղտնի տեղեկությունները, ի տարբերություն պարզապես գաղտնի տեղեկությունների, ձեռքով էին գրված:

Դա արվել էր գաղտնիության առավելագույն մակարդակ ապահովելու նպատակով: Այդպիսով, նախքան Ստալինին ներկայացվելը այդ տեղեկությանը տիրապետում էր միայն այն մարդը, ով անձամբ էր դա գրել:  

18.05.2019 

Խաղ 2 | Մինաս Մինասյան, ատամնատեխնիկ Երեւանից 

Փորձելով պայքարել ծխելու դեմ՝ Ամերիկայի Միացյալ Նահանգների Լոս Անջելես քաղաքի հուշանվերների խանութներից մեկը վաճառքի հանեց յուրօրինակ մոխրամաններ, որոնք միտված են առողջ ապրելակերպի խրախուսմանը: 

Հարց
Ի՞նչ են, պատկերավոր ասած, սկսում անել մոխրամանները, երբ դրանց մեջ ծխախոտի մոխիր են գցում:

Պատասխան
Երբ այդ մոխրամանների մեջ ծխախոտի մոխիր են գցում, այդ մոխրամանները սկսում են հազալ: 
Շնորհիվ ներկառուցված հատուկ մեխանիզմի՝ մոխրամանն արձակում է մի ձայն, որը ծխող մարդու հազ է հիշեցնում: 

 
11.05.2019 

Խաղ1 | Քրիստինե Ղազարյան, տնային տնտեսուհի, Մոսկվա

1964 թվականին ճարտարապետ Ֆելիքս Հակոբյանը նախագծել է մի օբյեկտ, որի ձևավորման համար օգտագործել է տենտ և այն պարաններով ամրացրել կառույցին:

Հարց
Ի՞նչ անվանում է տվել ճարտարապետն իր նախագծած օբյեկտին: 

Պատասխան
1964 թվականին ճարտարապետ Ֆելիքս Հակոբյանը նախագծել է մի օբյեկտ, որի ձևավորման համար օգտագործել է տենտ և այն պարաններով ամրացրել կառույցին: Հակոբյանն իր նախագծած սրճարանն անվանել է «Առագաստ»:
27.04.2019 

Խաղ 8 | Միսակ Մարկոսյան, ոստիկանության փոխգնդապետ Երևանից 

Այրվածք դեմքի շրջանում,
ոտքի վրա կանգնելու անկարողություն,
տարիքին անհամապատասխան զգացողություն,
ակտիվ արցունք արտադրություն,
թեթևության զգացողություն: 

Հարց
Ո՞վ է բարձրաձայնել իր մոտ այս բոլոր նշանների արտահայտման մասին, և երբ էին ի հայտ գալիս այդ նշանները: 

Պատասխան
Հայաստան ասելիս այտերս այրվում են,
Հայաստան ասելիս ծնկներս ծալվում են,
Հայաստան ասելիս հասակս ծաղկում է,
Հայաստան ասելիս աչքերս լցվում են,
Հայաստան ասելիս թևերս բացվում են..

Այդ ամենի մասին իր բանաստեղծության մեջ բարձրաձայնել է Համո Սահյանը, իսկ այդ նշաններն իր մոտ ի հայտ էին գալիս Հայաստան ասելիս: